بطاقة الولاء من سيفورا | Sephora's loyalty card

أهلن بنات 

اليوم راح اتكلم عن برنامج تجميع النقاط من سيفورا أو مايسميها البعض بطاقة الولاء
 اشوفها مره حاجه حلوه خصوصًا انه فيها مميزات كمان حقلكم عليها 

بإختصار هيا عبارة عن بطاقة تستخدميها كل ماتشتري من سيفورا وتُضاف لكِ نقاط

كل 10 ريال تعتبر نقطة وكل ماوصلتي 200 نقطة يدوكي هدية! في احلى من كدا؟ 

البطاقة في منها انواع 

1- بطاقة بيضاء | White card

2- بطاقة سوداء | Black card 

3- بطاقة ذهبية | Gold card

في البداية يدوكي البطاقة البيضا ولما توصلي لـ 200 نقطة تاخدي البطاقة السودا ولما تعدي 1500 نقطة تاخدي الذهبية!

طيب كيف تحصلي على البطاقة؟ 

بكل بساطة لما تجي تشتري من عندهم اطلبيها من الكاشير وحيديكِ ورقة تعبي بياناتك وتاخدي البطاقة في نفس الوقت 

ومهم مهههم يكون رقمك صحيح والأهم ايميلك لانه كل شي حيترسل عليه! اذا وصلتك هدية او عديتي 200 نقطة وكمان عروضهم.

نتكلم دحين عن المميزات

لما يكون عندك البلاك كارد يرسلولك تخفيضات حصرية ودعوات لإيفنتات خاصة وكمان يرسلولك هدية لعيد ميلادك (لهم مني كل التقدير على دا الشي ههههه) يعني هدية ثانيه غير اللي اخدتيها عشان وصلتي 200 نقطة

البطاقة الذهبية مميزاتها اعلى شويه يعني فوق دي الاشياء الهدايا تكون احسن من البلاك كارد والعروض والتخفيضات اقوى

حقلكم عن تجربتي 

اول مره وصلت 200 نقطة جاني ايميل استلم الهدية وطبعا في كود في نفس الايميل لازم يشوفه اللي هناك فالمحل

وبعدها بفتره وصلتني رسالة على رقمي استلم البطاقة السودا من نفس الفرع اللي اخدت منه البطاقة البيضا اول مره 

الهدية الاولى اللي وصلتني من كات فون دي، مررره مره حبيتها ( طبعا يكون في هديتين ويخيروني ايش اخد)

روج احمر، حجم ميني

روج سائل مطفي (لوليتا)، حجم ميني 

ايلاينر، حجم عادي 

طبعًا لوليتا من الالوان الرهييبه اللي جربتها من كات فون دي

اتعب وانا اقول اللون يجنن 

وهذه الهدية الثانية من ميكب فور ايفر 

مجموعة قلوسات اثنين ميني 

وواحد حجم عادي 

وكمان محدد

 حبيت المحدد اكثر شي ولونه جدًا جمميل 

واخيرًا في حاجه مهمه! 

شفت كثير بنات يقولو وصلو اكثر من 200 نقطة وسيفورا لسا مااتواصلو معاهم!

في دي الحاله مرره لاتكلمي اللي فالفروع لانو ماعندهم غير مماطلة وماحيفيدوكِ بشي 

اتواصلي مع الشركة الأم على دا الإيميل وعلى طول اكيييد حتنحل المشكلة ان شاء الله .

Loyalty@sephora.ae 

وقبل ماانسى في كمان لهم تطبيق على الأب ستور تقدرو تحملوه وتشوفو منه نقاطكم

دا كل شي وان شاء الله اكون افدتكم

.

Instagram : @Mlbeauty1

Snapchat : MeaadBeauty

Email : Meaad.beauty@gmail.com