طريقة الطلب من المواقع في النت | How To Order

بسم الله الرحمن الرحيم

أول تدوينة ليا حابة أفيدكم فيها وهيا كيف تطلبو من المواقع.

لازم تعرفي هل الموقع يوصل دايركت لمدينتك او لا، فإذا كان مايوصل في هذه الحالة لازم يكون عندك بريد أمريكي أو بريطاني على حسب الموقع اللي بتطلبي منه 

عندنا كثيير مواقع توفرلك هذه الشغله منها World ship ويخصص لك بريد امريكي فقط وميزته التجميع والاشتراك برسوم دايما كل سنه يكون في تخفيض ويسير الاشتراك ب 1 دولار فقط استغلو الفرصة، التجميع هوا انك تقدري تطلبي من اكثر من موقع
وتجمعيها في البريد وتشحنيها دفعه وحده! بس لازم تعرفي معلومه مهمه
انهم مايعترفو بالحجم الوزني يعني لو عندك شي حجمه كبير ووزنه قليل زي مثلا المخده اعرفي انه قيمة الشحن حتكون أعلى والعكس صحيح.

في عندهم خيارات حلوه فالشحن زي تختاري شركة الشحن واشياء تخص الشحنة حقتك

لتفاصيل أكثر شوفي موقعهم من هنا  ~

ومن ضمن المواقع كمان Shop and Ship ميزته يوفرلك أكثر من عنوان بريد في امريكا والصين وبريطانيا وتركيا وغيرها من الدول برسوم وفي اكواد كثيير تسجلك مجانا، عيوبه ماعندهم خاصية التجميع، كل طلب ينشحن لحاله، ويعترفو بالحجم الوزني يعني صغير بس ثقيل حياخذو في الاعتبار وزنه بkg ، عكس تماما World Ship .

موقعهم تقدرو تشوفوه من هنا ~

طيب حقولكم على اشهر المواقع اللي ممكن تطلبو منها

1) Nordstrom

متنوع بين الميكب والشنط والملابس، التوصيل دايركت مايحتاج بريد.

2) Drugstore & Beauty

الموقعين تابعين لبعض يعني سلة وحدة، الاول فيه جميع منتجات الدرق ستور والثاني الهاي اند ولازم بريد امريكي .

3) جولي شيك

ملابس وشنط... الخ والتوصيل دايركت

4) امازون

متنوع، اغلب المنتجات تحتاج بريد امريكي وبعضها عادي دايركت على حسب البائع 

هذه أشهر المواقع، نجي للشي المهم وهوا الفيزا اللي حتطلبي بيها، تقدرو تاخذوها من اي بنك وفي بعضهم ياخذو رسوم سنويا وبعضهم لا، أفضلهم في نظري الراجحي ورسومهم 100 ريال سنويا.

 حوريكم طريقة الطلب من أي موقع بعد مايكون عندك بريد أمريكي 

بيانات بريدك المريكي حتكون كدا بالنسبة لموقع World ship 

1- تدخلو الموقع اللي حابين تطلبو منه  

2- تروحو لخانة التسجيل، حيطلعلكم كدا

3- اللي حاطه عليها علامات تعبوها نفس اللي مكتوب في البريد الامريكي وتحطي علامة صح فالخانة اللي عاليمين والباقية تعبيها عادي ببياناتك اللي سجلتي فيها اول فالبريد، الايميل والاسم.

4- بعد كدا بعض المواقع تطلب منك باسوورد وبعضها لا وتحطي اللي تبغيه

5- واخر واهم خطوة، الدفع

تختاري طريقة الدفع غالبا بالكريدت وتحطي نوعها فيزا او ماستركارد حسب اللي معاكي

والرقم وتاريخ الانتهاء واسم الشخص اللي مكتوب عليها وبعدين حيطلب منك رقم مكون من 3 ارقام حيكون خلف البطاقة. 

الايميل مهم جدا تشيكي عليه كل شي حيكون عن طريقه لما يوصل طلبك للبريد او اذا حصلت مشكله فالطلب او ما تم الدفع  

بعد ماتوصل بريدك الامريكي حتسوي اخر مهمه وهيا انه تشحنيها لمدينتك وتدفعي عن طريق الفيزا تكلفة الشحن وأول ماتوصل حيتصلو عليكي شركة الشحن انو تستلميها أو يوصلوها على حسب الشركة. 

دي هيا طريقة الطلب من المواقع حاولت اختصرها قد مااقدر وان شاء الله تستفيدو